Maraadhu namana!

Maraadhu namana!

 ፨   ፨    ፨   ፨   ፨

   Maraadhuu si gorsee

   Maa mataa jabaattaa?

   "Maraadhuu" si gorsee

   Diddee dhukubsatta

Maraadhu namana...

Yoos fooyyee argattaa.

*    *     *

Dafqa xuruurfattaa

"Akka gugee kaattaa

Harka buleen nyaattaa”

Bayyaannadha seeta

Ofumaa dhamaata

Maraadhu namana…

Maraattee fooyyoftaa!

*     *     *

Inni fayyaa bule godoo taa’ee muga

Kan maraatee garuu, olii fi gadi fiiga

Ofiis nagaa lagee, kaanis nagaa laga

Kaleessa cirracha hardha warqee haga.

                                               

*    *     *

Amma utuu maraattee……

Daangaa murtee nyaachuu

Fedhe Waaqaa wojjiin iccitii hirmaachuu

Haadha Margoo hattee bobaakeetti baachuu

Uurjii fottoqsitee sanyoof kennaa laachuu

Eenyutu si dhowwa?

Lakkii hin ta’in gowwaa;

*   *    *

Amma utuu maraattee…

Mataan si dhukubnaan kaaniitu sii bowwa’a

Garaan si ciniinnaan kaantu siif alba’a

Yeroo ati gaggabdu, isa kaantu sii du’a

Maraadhu namana, lakkii hintain gowwaa

*   *    *

Amma utuu maraattee….

Amma utuuma taatee…. maroo maraaticha

Sukkaaraa facaastee, sukkaara haammachaa

Sukkaara hammaartee, sukkaara siphachaa

Akka Abbaayyaa Biiftuu akka namichichaa

Yoo hadhoofte maali akka baala eebichaa?

Dhibeekee fooyyofta; argattee qoricha.

            *   *    *

Maraadhuu namana fayyaa hinta'in lakkii

Addaan babayitti lallabii mammaakii 

Qaqaa dhaaf raacitii hammaarii waliin maki

Galma Waaqaa seenii caraanii alaakii

Seexana faarsiitii Maleekammoo yakki

Rifatee haa utaaluu qeesiin akka tafkii.

*   *     *

Bar; utuu maraattee…

Dacheen indhuunfatta

Waaqayyuu harma hoota

Seera hundaa ol taata

Safuu ijatti tufta

Feete seera tumta

Feete cirtee gatta,
Alanfattee tufta
Addaanbabayitti, feete raajii himta 
Feete hin bulgaafattaa
Bar homtuu sin sugeessu, akka harreef booyyee
Akka haadha Sonkooroo, akka Akkoo Manooyyee
Hooda maddaa ooltee, hooda maddaa bulta, guyyaa, guyyuufi, guyyee.

*   *    *

Amma utuu maraattee…..

Qilleensi inni baddaa, qilleensi gammoojji

Qilleensi gubbaa tulluu, qilleensi dachaa bajjii

Waayeekee bubbisaa

Warri beedeekeetii, kan sitti firoome maqaakee ol kaasaa

Warri argaakee jibbu, warrii badiikee sirbu, cubbuukee asaasa

Maleekaan siif gaddee imimmaan lolaasa

Seexanaan wal beektuu, arraaba sitti baasaa

Maraadhu namana, maraadhu maal abbaasaa.

                 *    *     *

Ammaa utuu maraattee….

Eyyama kee malee dhiyeeyyuu hin bariyuu

Hin qorru hin dhaamotu, aduun bayee hin ho’u

Eyyemakee malee bar hin qilleensawu

Eyyemakee malee huurriin hin socho’u.

Eyyemakee malee….

Bar urjiiniyyu hin iftu, baatiinu hin goobantu,

Eyyemakee malee….

Niitiin abbaa-warraatti bar hin bargaanfattu.

*   *    *

Amma utuu maraattee…. haati manaakeeyyuu,

wichiroo raafuutiin bar bokokaa hin bultu

Maraadhu namana… nyaata dhangaa haa quuftuu

Maraadhu namana…, wiskii ’ttaa ’bbuuqqattu

Akka warra kaanii, shiittoo dhuufaa haabultu!

*  *   *

Amma utuu marattee giiftiifaa soqoltee

Amma utuu maraattee gooftaafaa kabaltee

Intala ’saaniiyyuu buttee baduu yaaltee

Namooma lagattee jinnii wayii taa’tee   

”Ibd naw zamanaayi” maali yoo jedhamte?

*   *    *

Amma utuu maraattee….

Kan jaallatte muudda

Kan jibbite faalta, yoo feetemmo insaadda

Yoo feete fannistee, yoo barbaadde inreebda

Akka fedha keeti…..,

Yoo barbaadde inrafta, yoo barbaadde inmugda

Barbaadde ijaartee yoo barbaadde indiigdda

Maraadhu namana, maaf na jalaa didda?

*   *    *

Bar; utuu maraattee kan hawwite hundaa battaluma argatta

Kan jaallatte muuddaa, kan jibbite faaltaa

Qabeenya hortee hin qabne, hammaartee tamsaasta

Feetee, maqaa Waaqa dhooftaa, yookaan dhawuusaa lagattaa

Yookaan, saba ajjeesuudhaaf, dura Waaqa ajjeesta 

Yookaan aangoo abjuu kanaaf galatakee jettaa

Rarra’aa fi maxxaanaa hundaaf kennu saafuu

Akka ittiin wal horee, lammiin akka fufu

Gararraa fi gajjallaa uraa uumuu saafuu

Gubbasii deeffachaa goodaa dhaa akka dhuufu

…jettee ogumsaa jajja

Maraadhuu namana, maalumaaf fajajjaa?

*   *    *

                                       Zelealem Aberra Tesfa

                                       24 / 02 / 2018

                                       Helsinki / Finland