Miti-Dhiirota Masaraa Mootii Chaayinaa
***
Faarsuu Oromoon buddeeniif faarsu keessaa: “Yaa buddeen dhirsa dhiiraa” inni jedhu toora tokko. Oromoon “Buddeen mootii dhaa” jedhas. Ulfinni buddeenniif qabnu hammam gudda akka ta’e himu jechoonni
kun. Asmaaronnis yeroo buddeeniif
weeddisan: “Badhaasaa Calqanii, Badhaasaa
Calqanii kan buddeen ajjeese madaasaa hin arganii” jedhu. Abbaa hubateef weedduun
asmaarotaa kun hiika sadan tokko of
keessa qaba. Inni tokko waayee isa buddeen dhabee beelaan du’uu ta’usaati. Inni lammaffaa waayee argu-itti-haree,
guyyaa guutuu waa nyaachaa oolu, kan wichiroon buddeena ykn (obesity) galafatee yoo ta’u; inni sadaffaanii fi inni cimaan,
walaloo kana waliin caalaa hidhata qabu garu akkataa itti buddeenich argme
irratti xiyyeeffata. Buddeenen argame sun heeraa fi seera, safuu fi maal naan
jedhuu boraafateetu argame moo abiyichi buddeeniif jedhee jira du’e, buddeeniif
jedhee eenyummaasaa ajjeese laata gaaffii jedhu calaqqisa. Namichi akkasiin
buddeen baafate jiraa du'e jechaa dha. Sadanuu buddeentu otoo hin madeessin,
otoo dhiiga hincobsin ajjeese jechaa dha.
***
Malaa fi tooftaa ittii buddeen argatan biiyi hundumtu akka aadaa fi heerasaatti
qabaachuunsaa mirkana. Warri Chaayinaas, keessuma warri harka-qalleeyyin, utuu biyyattiin bakka hardha jirtu kana hin
gahiniin dura tooftaa fi mala uggumsiisaa qabu turani. Dhimma kana qorattoonni
muraasi qoratanii galmeessaniiru. Galmeensaani kun keessumaa iyyeeyyiin biyya
Chayinaa mootiif bulanii, masara mootii keessatti ashakarii ta’uun aangoo cimaa
fi buddeen furdaa argachuuf miidhaa suukkanneessa isaan eenyumaasaanirraan
gahan maal akka fakkaatu galemmeessaniiru. Walaloonkoo kun galmeesaani
kanarratti hundaawa. Dhimma kanarratti kitaabonnii fi barreeffamoonni
adda-addaa waan jiraniif sakatta’a gochuu ni dandeessu. Kankoo kaayyoon seenaa
uggumsiisaa kana akka natti dhagahametti isiniin gahuu dha. Akkuma walalookoo
isa “Du’a gurraacha” moggaafame sanaa jechuukoo
ti. Kanaafuu walaloon seenaa boraafate kun haa gabaabbatu malee – gara
fuulduraatti dheeressuun, cululuqsuun ykn yoo barbaachise shaakatteessuun akkum
jiru ta’ee, ammaaf isa dhiyaate kana “Lafa
hinbuutu, lafeerraa buuti” jechaa naa
caqasaa. Elaa kunoo ti:
Miti-Dhiirota Masaraa Mootota Chaayinaa
***
Biyyeen biyya Chaayinaa, sammuushee cuunfite
Taatee taatessitee, Budhaa itti kadhattee
Yaadaa fi meeshaas hortee
Kompasii fi baaruda, adunyaa
badhaaste
Haarrii fi waraqata, seismograph
fi shaayi
Marqaa rirma-baallee, gojjolaa foon bofaa, affeellii fi
akaayii
Akaayii goonjiree, akaayii goondaa diimaa yookaan kan
gurraacha
Foon loccuu, foon xuqaa ykn kan fattee fi akkasumas raacha
Baala
dhangaggaawu, baala isa mi’aawu, sukkaaraa fi eebicha
Ittiin guuttachuu dhaaf (xeerii)
fi garaacha
-
(Lammileen Siikkoo fi Mandoo maaloo na oofkalchaa)
Munyuuqaa lafarraa isa kam afeellee isa kam waxallaa?
Raammoo bishaan keessaa yoo maal goonee nyaannee ittiin
lama bullaa?
Dugguloo luxuu leemmanaa, affeellii luxuu shimalaa
Hedduu gumachani, waan ittiin ajjeesan agabuu fi beela.
***
Beekoo marii’agessa, Konfucious fi Sun Tzu
Zhuangzi, Mencius akkasumas Lao Tzu
Eeyyee….seena saani keessaa hooda baayyee qabu
Garuu…hunda caalaa kan nama ajaaibu
Homaa hin balfani hunda warakkabuu
Beela mo’achuudhaaf, daangaa safuu darbu
Dubbii ajaa’iba dubbii akka
hooda
Suukkanneessaa qalbii, adoochaa
gudeedaa
Dubbii rifaasisaan suukkanneessaan sammuu
Dirqii tokko malee fedhumasaaniitiin dhirummaa sarbamu.
Homaa hin leeya’ani, hamileensaani hin cabu
Quunxee of mursiisani riqa aangoo ittiin yaabu.
Kunoo akka kanaan…dhiirri Chaayinaa durii
Qaalluun itti haa himuu cinaankee gurguri
Itti muldhisinnaa jawwichi saani sun, itti himinnaa
tarii?
Jawwee abidda tufu, inni koochoo qabu, kan kotteen
afurii?
Balali’aan sammii, baqqaanaan qilleensaa, tatarsaasaan
huurrii.
Dhiirummaasaa kennee xuwaashummaa filata
Ulfinaafi maqaasaa bar darbatee gata
Eenyummaaf maqaasaan buddeen jiijirrata
Cinaan of mursiisee aangoo ittiin argata
Qeyee mootii Chaayinaa miti-dhiirotaan guuta.
Tarkaanfiinsaa kun maaliif akka ta’e sababa tarreessa
Raashinaalee
kennuuf waan hedduu odeessa:
“Dhiirummaan
maal godhaa?
Harma
mootiin hodhaa
Dhiirummaan
maal bu’a?
Garbicha
amanamaa ta’een nyaadhee du’a.
Quunxee
harreef dhiise! Harree abbaa gaangoo
Anaaf
buddeen kennaa, buddeen furdaa fi aangoo
Cinaan
boollaa haa lixu quunxee haadabalatu
Dhiirummaa
geeraran silas maal buufatu?
Dhiirummaan
maal bu’aa? Barr’ abbaasaa haanyaatu”
Raashinaalee kanaan xuwashummaa filatu.
***
Dhugaa dha, ija mooti duratti isaantu amanama
Iciitiin masaraa isaanitti himama
Aangoo fi qabeenyaan irkoo jabeeffatu
Qaalluu amantaa Budhaan haariiro tolchatu
Siyaasaa biyyatti harkatti galchatu
Isaan harka jira aangoon waa hundumtu
Mooti sana waliin eenyu akka dubbatu
Isaani kan murteessu
Gurra mootii sanatti eenyu akka asaasu
Isaantu ol liccisa
Isaantu ittisa
Isaantu kan gadi baasa
Isaantu shira xaxa
Isaantu miriixa
Bar quufee firinxiixa.
Mootii arguuf jecha abbaan haa wareeguu
Yookaan haa shimilu yookaan haa munaagu
Fedhe haa dheekkamu yookaanis haa fagu
Miti-dhiiraan yoo hin jenne eenyuyyuu mooti hin argu.
Yoo muraasaa malee….
Bar amanamoo dha xuwaashonni hundumtuu
Akkas ta’usaaniis mootiin akka hubatu
Waan baayyee hojjetu, …waan baayyee hojjetu
Fakkenyaaf…yeroonni qufa’u, yeroonni haakkiafatu
Barruu itti qabatu, beleesaani afu
Lafatti akka hin tufne, akkanni itti tufu.
Mootii nagaa taa’u, hin kufin ol qabu
Yoo inni dhukubsate, ofii fayyaa dhabu
***
Amanamaan kun giiftiifaas hin eega
Eessaa ciisee rafaa, eessaa taa’ee muga
Yaandoo gad haa naquu bubbeen haa bubbisu
Dukkanaan-adeemaan kan gufuu buqqisu
Jarjaraan ganamaa kan fixeensa buusu
Bifaan booji’amaan kan jaalalli fiigsu
Inni yaadasaatiin giiftifaa soqolu, wayyaa irraa quncisu
Ofumaa dhama’a namichi akka lootuu giiftiitti qaxxisu
Ofii-maayii-hin-baasneen kaanitti hinaafisu
Eessaa fucha kennaaf, kottoonfatee eega, bar ijasaa hin
liphsu.
Abdii haa kutatu inni giiftii gaaadu
Fedhe… dudubachaa hadeemu yookaan ciisee haa aadu
Miti-dhiiraadhaa jiru giiftiin sanyoo hin qabdu.
Halkan ta’e guyyaa, isaa achi jiru
Dhiirri
achiin hin darbu, bar hin qaxxaamuru.
***
Eeyyeeni… dafqa malee nyaatu,
yeroo inni kaan dafqu
Riqa angoo gubbaa ol siquu gad
siquu
Hinaaffaa
fi shakka ceephoo fi wal qeequu
Walirratti
shiruu yaadaan wal miliquu
Garuu
hunda caalaa…
Coomaa
bangal gochaa, daadhii wayinii habbuuquu.
Haa ta’uyyuu malee… karaa isa
kaanimmoo
Qoodaa jiruusaaniif hedduu amanamoo
Eegee raasuu kanaan, sareedhaan dogomoo
Mootichaaf Mooteefis hedduu mararamoo
Jireenya rifaasisa haalota
hedduu hamoo
Kana hunda nuffuun baduu
yaalanimmoo
Kan isaan eeggatu adabbii
ciccimoo.
***
Eeyyeeni….qooda hireesaaniif bu’aa guddaa argatu
Salphinaan maranii buddeen furdaa nyaatu
Eenyummaa gatanii aangootti asii ol ba’u
Dhiiraaf dhalaa gidduu ginniffa rarra’u
Qabeenyaan ol siqu, namummaan gadi bu’u
Eenyummaa machaawu, dhiirummaan hindu’u.
Kunoo kana hubatee …namni isaan tuffata
Argasaani jibba sabni isaan baqata
Firri isaan mufata, ni balaaleffata
“Yaa
mit-dhiiraa masaraa
Yaa
albaadhessa abbaa-garaa”
Jedhee itti geerara.
***
Egaa…kunoo dur akkasi, hardha garuu hin jiru
Jawwichi itti haa himuu, kan qilleensa keessa oli-gadi
marmaaru
Yookaan waaqisaani, Bud'haan haa gargaaru
Hunduu hin jijjiramaa bara dhufee taru
Miti-dhiirummaa sana hardha dhiisaniiru
Iyyeessi Chaayinaa tokko…
Buddeen furdaaf jedhee eenyummaa hin jijjiiru
Aangoo argachuuf jecha…
Of hin xuwaashessu dhiirummaa hin guguru.
***
Zelealem Aberra Tesfa
Caamsaa
4 bara 2021
Helsinki / Finland
Comments
Post a Comment