Sankofa
Zelealem Aberra Tesfa tiin*
“Hinta’a jennaan, harree qalle
Hinta’u; jennaan, harree ganne
Qoricha; jennaan,
dhaqnee dhabne!”
Jecha Sankofa jedhamu kana Saba
Akaan, biyya Ghanatu addunyaaf kennaa kenne jechuun ni danda’ma. Hiiki jecha
kanaa – akka Wikipedian kaa’etti, – “teellaatti deebiani fudhachuu”
jechuu; yookaan mallattoota (symbols) warra Asantee isa Adankira
jedhamu keessatti, mallattoo simbira (shimbira) ofirra galagaltee hanqaaqu
(killee, buphaa) dugdasheerraa fuudhaa muldhatuu ti. Yeroo baayyee kan jechi
kun hidhata qabaatu makmaaksa warra Akan isa: “Se wo were fi na
wosankofa a yenkyi” jedhuu waliin yennaa ta’u; hiikisaas, “Waan
irraanfatame deebianii fudhachuun badii hin qabu.” jechuu ta’usaa ibsa Wikipedian.
Simbirro Sankofa
mallattoo Adankira keessaa:
Simbirroon jecha Sankofa
mallatteessitu kun hanqaauu dugdarratti baattee muldhatti. Hanqaaquun sun
mallattoo egeree ta’usaa ti. Akkuma kanaan kan isheen ofirra galagaltee ilaalaa
jirtu kun kaleessashee qofaa otoo hin taane egereesheetis. Egereeshee kana
yookaan hanqaaquushee, kan kunuunsu, kan haammatu ishee qofaa ta’u qaba. Akkuma
beektan simbirronni hundi akka hormi hanqqauusaani qaqqabu hin fedhani.
Hanqaaquun hormi qaqqabe wucoo ta’unsaa hafee ajeessaa ta’a. Aadaanis akkasuma.
Abbaatu kunuunfata, harki ormaa qaqqabnaan ajeessaa ta’usaa ti. Jechi Sankofa
kun hardha biyya Ghana irra cehee idle adunyaa irratti bifa adda addaatiin
beekameera. Fakkeenyaaf, akka armaa gaditti muldhatutti, dhaabbilee aadaa fi
barnootaa tokko tokkoof mallaattoo yookaan asxaa ta’ee argina.
Beekamaan ogeessa
filmii Obbo Haile Garima, bara 1993 filmii Sankofa** moggaafame
hojjetee hawaasa filmi do’achuu jaallatuuf dhiyeessee ture. Filmiin kunis
do’attoota kana biratti jaallatama guddaa waan argateef Obbo Haile Garimaaf
badhaasa baayyeef maqaa olaanaa akka kennisiiseef dhageessaniittu ta’a.***
Ergaan Sankofan of keessatti baate
kun hannisa qabeessa waan ta’eef, fudhatamaa fi hubannoo guddaa argateera.
Qalbii nama baayyees booji’eera. Sankofan hardha faayya wayyaa
(huccuu) ittiin faayyan; lootii gurratti kaayyatan; dirii mormatti diratan ta’e
argina.
Jaallatama guddaa waan argateefis namoonni baayyeen kutaa qaama saani keessaa isa tokko akka ta’u waan heddu hawwaniif, qaama isa uumaan kenneefitti akka makamee tokko ta’u yaala waan jiran fakkaatu. Yoo keessa qaamaatti makamuu baatellee, gogaa nandhaarratti jechuufani. Kanaafu dubartoonni mallattoo simbira Sankofa, qiinxii dugdaarratti, mudhiirratti, harkarratti, salgiirratti, mormarratti; dargaggoonni harkarratti, qomarratti, miillarratti tumatanii argina.
Suuraa
hundi www. Google.fi kessaa ergifatamani.
“Dubbiinoo itti gala qabaa; maaliif waayee Sankofa
kanaa kaastee afaan nugogsitaree?” jechuun keessani oola hin fakkaatu. Waayee Sankofa
kanin hardha kaaseef haala nuyi amma keessa jirru waliin hidhata waan qabu ijaa
natti fakkaate. Ergaa Sankofa keessaa yookaan dammaqinaan (consciously),
yookaan dunquqquun (subconsciously) waan simannee keessumsiisaa jirru
natti fakkaata. Yeroon ammaa kun Oromoota baayyeef (anaanuu dabalate) yeroo
nuyi aadaa keenyaa fi amantii abbootii keenya waliin battala wal kallatteesine;
yookaan addaan walitti buune yoon jedhe dhugaarraa fagaadhe natti hin fakkaatu.
Qabiyeen aadaa keenyaa fi amantii keenyaa baayyee keenyaaf keessummaa dha.
Lakkobsa mandheen qabiyyee kana hiikamee waan haaraan keessaa as bayee
dhageenyetti, yookaan arginetti “Edaa kunis jiraa? … Edaa akkasii?” yeroo itti
jennee uggumsiifannu. Ofteellaa mildhachuu keenya kana maqaasaa Sankofa
hin jedhin malee; of teellaa mildhannee waan daganne, waan irraanfanne, waan
gatne “Waan kun nu fayyaduunsaa hin oolu” yeroo itti jennee madaallu. Kanaafu
seenaa keenya keessa, amantii keenya keessa, durdurii fi hooda keenya keessa
galagallee mildhachuun, xinxaluun, sakattaanee galmeessu jalqabuun keenya kun
jecha Sankofa warra Akan kana waliin wal una! Teel-mildhuun
akkasi kun bu’aa baayyee inni qabu keessa tokko, seenaa fi aadaa saba isa kaani
waliin kan wal nu fakkeessus yookaan kan adda nu taasisus kan arguu dandeenyu
isa keessaati ta’usaati.
Haata’u maleessa, yeroo waayee amantee keenyaa
kaasnu waayee mythology yookaan hooda durii tuffannee dhiisnee yookaan
gatne yookaan dagannee dabarra jechaa miti. Adunyaan misoome kun, isa lixaas
haa ta’u isa bahaa; hooda akaakilii fi abaabileen saani ittiin jiraatani darban
“kun hooda bara doofummaa ti”, jedhani isanuma waliin awwaalani harka
haxaawatani hin teenye. Qoratani, sakatta’anii bifa barrootiin, bifa filmiitiin,
dramaatiin (do’itiin) galmeessani, ol kaa’u qofa otoo hin taane
hardhayyuu bifa adda addaatiin itti gargaaramaa jiru. Dhugaa dha, fakkeenyaaf Werewolf
(nam-wangoo), mermaid (addooyyee galaanaa) yoo dur-durii
keessatti ta’e malee yeroo ammaa kana namni qaamaan jiraachuusaani afaan guute
dubbatu isa qalbiin hubame ta’u qaba. Biyya Orooppattis ta’e iddoo kaanitti,
lakoobsa baatiin goobantee cagginaayetti Werewolf (nam-wangoo)
yeelalu hin arginu, hin dhageenyu. Gargaarsa saainsiitiin garu yeroo Michael
Jacssoni ija keenya duratti nam-wangootti geeddaruuf fakkeessan argineerra. “Saainsiin
dagaageera, hoodi kun hooda jabana warra doofaa ti; siachi maal nu fayyadaa?”
jedhani hooda durii sana hin awwaalle.
Hardha waltajjiin ogina warra misoomee (filmi,
opera, drama, weedduu fi sirba, akkasumas kartooni, fi siidaa) ofirra
galagalee, hoodasaa durii keessaa qabeenya abbootisaarraa dhaale, yookaan aadaa
abbooti durii saainsiin maree hawaasa hardhaaf dhiyeessa. Yeroo Charleton
Heston Musee fakkaatee Galaana Diimaa iddoo lamatti baqqaanu hundi keenya
agarreerra natti fakkaata. Beekaafi ogeessa saainsi kan ture, Albert Anestin
nama jedhamu tokko natti fakkaata kan: “Science without religion is lame,
religion without science is blind.” kan jedhe. “Saainsiin amantii malee naafaa; amanteen
saainsii malee jaamaa.” akka jechu!
Kana yeroon jedhu, lakkobsa irriba dhabnee wareera
bulletti cittuu sibiilaa boraati jala kaawwannee haarafnuu; lakoobsa ganama
bultee nyaannee buna dhugnutti oolmaa keenya hardhaa dursinee baruuf shinii
bunaa gombisnee haa ilaallannuu; hantuuta du’ee karraarra ciisurra hin tarkaanfannu;
yoo dagannee tarkaanfanneerra ta’e irra haa deebinu; nuyii dhimmaaf manaa
ba’hu, yoo dubartiin ollaa okkotee duwwaa baattee nutti dhufte; yookaan funyoo
marattee nutti dhufte ofirra galagallee gara manaatti haa deebinuu; jechaa koo
akka hin taane beektun jedha. Dabaleess, fakkeenyan mariif dhiyeesse kanas
hundatu “tole” jedhee mormii tokko malee fudhata jechuufis miti. “Lakkii yaa
obboleessoo; an eegan cittuu sibiilaa boraafadhee buluu jalqabeeti kanin
wareeruuf bibirr’achuu dhiisee irriba nagaa rafe!” kan jedhu yoo jiraate,
namni kun cittuu sibiilaa boraafatee irriba nagaa rafuunsaa anaaf mataa bowwuu
ta’e irriba na dhowwu hin qabu. Sibiila cittuu boraafatee rafuunsaa nama kanaaf
suga qorqalbii (Psychological satisfaction) fi irriba nagaa kenneeraaf
taanaan; anaan maaltu qiinxe!
Oromoon bara durii bakka jiraate hundatti, jiruu
hojjetee ittiin buluutti yeroo bobba’u rakkina isa mudateef furmaata akka ta’u;
akkasumas naannasaa waliin nagaa jiraachuuf, waan lubbu qabuufis ta’e waan
lubbuu hin qabne hunda waliin hariiroo nagaa uumuuf seera hin barreeffamin,
seera waloo (common law) uummatee, ittiin jiraateera. ture natti
fakkaata. Akkaata Oromoon haala uumaa tokko tokko simatee, yookaan deebi inni
kenne (dhukkubaaf, humna uumaa isa rifaasisaaf kkf) oguma saainsiis
walin waan hidhata cimaa qaban fakkaata. Fakkeenyaaf, inni warri keenya bokkaan
yeroo roobu qottotti ramacii fi mokota hammaarani qarmammeetti balabalaarra
kaa’an, bakakkaa ittii qolachuufi laata? Warri Orooppaa akka shiboon bakakkaa
qolatan ni beektu mitii? Wayyaa (huccuu) miiccamee qoore utuu hinqabanaayin,
akkuma aduu keessaa fuutataniin hinuffatina nuun jedhu turan warri keenya.
Tarii qaama qabbanaawatti wayyaa (huccuu) ho’aa uffachuun qufaa fi libaalibbee (fever)
namatti fida laata? Orooppaan gaanfaa fi dhulaandhulaan kooba. Oromoonis
kolbaan yookaan gaanfan kooba. Orooppaan kubbaayyaa fi jirbiin buta; Oromoonis
akkasuma. Utuu Freud waayee Odipus Syndromi (Odipus hinffaarraan kan
ka’e, abbaasaa ajjeesee haadhasaa fuudhee jdha mytholojiin warra Greek;
safuun kan Waaqaatiii!) adunyaatti hin ibsin dura hin tain oola jettu kan
Oromoon “Qoccoon kun abbaa ajjeeseeraa?” jedhee gaafate? Matuma waan dura
kaanee teellaatti hafne natti fakkaata! Wanti tokko garuu ifaa akka baatii
birraati: Isaan kansaani nimisoomfatani. Kan keenya ni quucare; yookaan ni
qummune. Waluma galatti yoo harkumaan of tuffannee of xinneessuuf kaane malee, abbootiin
keenya saayinsiifis ta’e amantiif, seeraa fis ta’e oginaaf, afaanifis ta’e (qooqaaf)
aadaa dhala namaatiif gumaata guddaa gumachuunsaani mamii hin qabu.
Kanaafu, abbootiin keenya bu’aa-bayii jireenyaa
keessatti rakkina isaan mudateef furmaata beekumsa saani yeroo sanaa irratti
hundaa’ani uuman waan ta’ef seenaafis haa ta’u egeree keenyaaf akka hundee
ta’uf qabeenya dhaalle kana “fokkisaa” haata’uu bareedaa, galmeessinee ol
kaayyachuun keenya badii hin qabu. Qabeenyi abbootiin keenya omishan kunis
qabeenya warri kaan omishan waliin wal keessa baduu hin qabu. Jechaan kreditiin
abbooti keenyaa harree harree keessa badde ta’u hin qabu! “A man who lost his
credit is dead to the world” jedhu warri Orooppaa!
Karaa kaanimmoo,
furmaati isaan rakkinasaaniif uumanii, nuyi dhalooti hardhaa dhaalle kun gara
fuulduraatti faaydaa haaqabaatus haadhabus, qaama seena fi aadaa keenya waan
ta’eef, gar tokkee qaama seena tokkoo awwaalani, gar tokkeesaa isa hafeen
jiraachuun danda’muunsaa, isinitti maal akka fakkaatu hin beeku; anaan garuu
jireenya sobaa, jireenya hirdhuu natti fakkaata.
Egaa, abbootiin keenya hin ta’a jedhani harree qalani,
haa jennnu! Nuyimmoo dhalooti hardhaa beekneerraa, qaroomneerra!
warri ofiin jennu kun, “hin ta’u, silumasaayyuu maaf harree qaltanii? …
Harree qaluun haraamii dhaa!” ittiin jenna ta’a. Isaanis, beektotaa
fi qaroomoo ilmooleesaani kanarraa gorsa ammayyaa argachusaanitti boonanii;
badii hojjetan kanatti gaabbaa; qaqqaanawaa; harree haranii gatu haa jennu.
Tarii, gaaftokko, “Inni haramee gatamee sun qorichaa, dhaqaa fidaa!”,
yoo jedhamee, fiduu dhaqanii yenna dhaban gaabbii dhalootaa dhalootatti darbu
gaabbuutu dhufa! “Waa kaa’uun hin baduu jette jaartiin durbbummaan hafte!”
jedha Oromoon, yennaa qoosaa mammaaku!
* Barreesaan: Zelealem Aberra Tesfa –
zelealemaberra@yahoo.com
** Waayee qabiyyee
filmi Sankofa yoo baruu barbaaddan, asii dubbisu ni dandeessu:
http://www.wmich.edu/dialogues/texts/sankofa.htm
*** Filmi Sankofa ilaaluuf as
tuqaa: (http://www.youtube.com/watch?v=BfAYqTxD_m8)
Barumsa guddaa nuu dabarsitani. Galatoomaa!!
ReplyDeleteHayyoota akkasii kanarraa dhalachuun Carroomuudha
ReplyDeleteYaa obbo Zalaalam, galanni keessan lakku lakkuu isiniif haa ta'utii; Jarri adii kun amantiin wal qabsiisanii aadaan keenya cubbuu nutti fakkaatee waa meeqa balleessine seetan! Amma egaa adadumaan itti deemnee deebifachuun dirqama taati.
ReplyDeleteBeekan ennaa jiraatte waa baruu
ReplyDeleteBeekaa keenya umurii arageessa nu jiraadha
Obbo Zelealem lammii koo, barrumsaa guddaan baraadhe,
ReplyDeleteGalaata guddaa qabduu. Qalamnii kessan ha mirgisuu.